【請手動複製轉，必需廣傳】
《阻礙救援等於蓄意謀殺》
關於尚德邨跌落樓重傷嘅周同學，我有啲嘢想補充。我係第一批到場嘅自願急救員。
我哋見到周同學嘅時候，有三個消防員同佢做緊急救。呢個時候，佢已經無咗意識、失禁、而且不斷嘔血。
佢全程都係無意識。一開始仲可以發出一啲聲音，同有一啲無意識嘅踢腿動作。對一啲「痛」亦會作出反應。當時嘅情況已經好危急，係好需要救護車，但一直無車到。
喺我哋做緊嘢嘅時候，無啦啦有幾個警察行埋嚟，用槍指住我哋，叫我哋走。
喺現場，除咗消防同救護，記者得一個。街坊亦都無。我哋全部人都喺度搶救緊呢個姓周嘅同學。全部人都有著反光衣，但係啲警察要我哋走。好彩啲消防員幫我哋擋住。咁啲警察嘈咗一輪之後，就走咗嘞。
過咗五分鐘之後，周同學嘅情況開始惡化。全身開始痙攣，完全郁唔到。剪開佢件衫之後，明顯見到有骨折變形、有腫塊。我哋現場嘅人員完全無裝備去處理呢個情況。
有個急救嘅隊友落咗樓帶救護車上嚟，但好耐都見唔到佢。跟住佢嘅脈搏開始跌、一路跌。跌到落 60，之後幾十秒之後，就跌到最低 41。呢個時候，佢連聲都出唔到，瞳孔反射都好慢。情況真係好危急！
但係樓下啲警察阻住，唔畀救護車過。落咗樓嘅 FA，跑到氣都斷，警察都係唔畀救護車過。
我哋真係好無助，手頭咩都無，幫唔到佢。救護車要差唔多喺受傷後嘅半個鐘頭後先上到嚟接手。消防同我哋幾個都攰到攤咗喺地下到。
由救護嚟到，到周同學上車，我哋全程都無講過嘢。氣氛真係好沉重。
如果唔係警察阻住救護，可能佢可以提早三十分鐘上車。早三十分鐘做手術。如果唔係警察阻住救護車，樓下嘅手足就唔洗以卵擊石，犧牲自己。
望住佢咁痛苦，我嘅心情不將惡化。我哋亦都做唔到嘢去幫佢。呢種感覺，真係好難形容。而家只要一合埋眼，我就見到我手套上有佢嘅血。周圍無聲嘅時候，我就會聽到佢痛苦嘅呻吟。
我全程都握住佢隻手，一開始佢仲識得捉住我。但到後來，佢嘅心跳變得慢。佢隻手慢慢鬆開。呢種感覺真係好難形容。
個心好似插咗把刀咁痛，好內疚。點解我做唔到多啲嘢幫佢？我哋圍住佢真係束手無策。可以做嘅嘢都做曬，除咗握住佢隻手，我哋真係無其他嘢可以做。
我唔知點解佢要冒咁大嘅險要跳落嚟。但係我知道佢跳落嚟嗰下一定係好驚好驚。我真係好心痛，我都唔明點解警察連開條路畀救護車都唔肯。
我唔相信，明明有警察見過周同學，樓下啲警察會唔知到呢到有個嚴重嘅傷者。
阻礙救援同蓄意謀殺無分別。
阻礙救援等於蓄意謀殺。
原文：網上
Search